Majhi Ladki Bahin Yojana December Installment Credited Aditi Tatkare Confirmation: मुख्यमंत्री माझी लाडकी बहीण योजनेअंतर्गत सर्व पात्र लाभार्थी महिलांना डिसेंबर महिन्याचा हप्ता लवकरच मिळणार असल्याची माहिती महिला आणि बालविकास मंत्री अदिती तटकरे (Aditi Tatkare) यांनी दिली आहे. निवडणुकीच्या आचारसंहितेमुळे या योजनेच्या हप्त्याचे वितरण थांबवण्यात आले होते. आता हे वितरण टप्प्याटप्प्याने सुरू करण्यात येत आहे.
आज किती महिलांना मिळाला लाभ?
राज्य सरकारच्या आकडेवारीनुसार, पहिल्या टप्प्यात आज 12.9 लाख महिलांच्या (12,87,503) बँक खात्यात योजनेचा डिसेंबर महिन्याचा हप्ता जमा करण्यात आला आहे. त्यानंतर दुसऱ्या टप्प्यात 68 लाख महिलांच्या (67,92,292) बँक खात्यात डिसेंबर महिन्याचा हप्ता जमा केला गेला आहे. मंत्री अदिती तटकरे यांनी त्यांच्या अधिकृत सोशल मीडिया हँडलवरून याबाबत माहिती दिली.
लाभार्थ्यांच्या खात्यात आजपासून पैसे जमा
मुख्यमंत्री माझी लाडकी बहीण योजनेअंतर्गत महिलांच्या खात्यात 1500 रुपयांचा हप्ता थेट बँक खात्यावर (DBT) जमा केला जाईल. यासाठी लागणारी प्रक्रिया सुरू झाली असून, डिसेंबरच्या अखेरपर्यंत सर्व पात्र महिलांच्या बँक खात्यात डिसेंबर महिन्याचा हफ्ता जमा होणार आहे.
2100 रुपये कधीपासून मिळणार?
महायुती सरकारने योजनेतील रक्कम 1500 रुपयांवरून 2100 रुपये करण्याचे आश्वासन दिले होते. परंतु ही वाढ आगामी राज्य अर्थसंकल्पात मंजूर होण्याची शक्यता आहे. या संदर्भातील अंतिम निर्णय अर्थसंकल्पीय घोषणेमध्ये जाहीर होईल.
लाडकी बहीण योजनेचा निवडणुकीत मोठा प्रभाव
महायुती सरकारला निवडणुकीत मिळालेल्या विजयामध्ये लाडकी बहीण योजनेचा मोठा वाटा असल्याचे मानले जात आहे. या योजनेमुळे महिलांमध्ये मोठ्या प्रमाणावर सकारात्मक प्रतिसाद पाहायला मिळाला. राज्यभरात जवळपास 2.34 कोटी महिला लाभार्थी असून, योजना यशस्वीरित्या सुरू असल्याचे मंत्री अदिती तटकरे यांनी स्पष्ट केले.
महिलांच्या आर्थिक सक्षमीकरणासाठी महत्त्वाची योजना
मुख्यमंत्री माझी लाडकी बहीण योजना ही महिलांना केवळ आर्थिक सहाय्य देण्यापुरती मर्यादित नाही, तर त्यांना आर्थिक स्वावलंबी बनविण्याचे लक्ष्य साधत आहे. या योजनेमुळे महिलांच्या कुटुंबांना आर्थिक स्थैर्य मिळेल, असा विश्वास सरकारने व्यक्त केला आहे.
लाडकी बहीण योजनेंतर्गत लाभार्थ्यांना डिसेंबरचा हप्ता मिळण्यास आता उशीर होणार नाही. महिलांच्या आर्थिक सक्षमीकरणाचा हा महत्त्वाचा टप्पा ठरणार आहे. योजनेसाठी पात्र असलेल्या महिलांनी आपले बँक खाते चेक करून पाहावे.
